سينما الستريبتيز

كاسترينغ ..

مصطفى العمراني

ممثل ما يتملق ما يكثر صحاب…  يدوز الكاستينغ ويتسنى الجواب

المخرج شاف صورتو وارتاح …….قال هذا للدور يصلاح

كلف الكاستينغ ينادي ويكرر…….عفاك هذا فين مكان يحضر

تركن وحط البورطابل بوذنيه……رجع غضبان وقال هذا ما يتعول عليه

السيد مفشش وطالب الغلى ….عندي مأحسن واللي اعطيتيه مايقول لا        

نضمنو ليك وماتندم فالاختيار ……..يحمر الوجه ويبدع فالحوار

ألو عندي ليك فرصة دالعمر……..وخا الكاشي قليل سيني واصبر          

سبعة ايام تصوير بألفين درهم……  دور غايهزك بلا ما تردد ما تخمم

ودير حساب حقي تماك …….مانستاهلش؟ وأنا داير جهدي معاك

عشرة ألاف ليا وثلاثين ديالك …..ماتنساش باللي حيدتو لواحد وهديتو لك

أعطيتك هاذ الدور وراني ومغامر …. بغيتي ما بغيتيش دور وزمر

عنداك تخوي بيا وتغبر ماتبان…..غدا نسينيو الكونطرا ونضربو كيسان

السي المخرج هذا مسمار طرقتو……قناص..يا ويل من أعطاك صورتو

معايا أنا مايقدرش يرفض……..قلت ليه نتعاونو البيدجي طايح للأرض

مسخوط وشحال درتي ليه؟……….خمسة ألاف درهم فورفي تواتيه

خطار ….وكيفاش طاح فالشبكة …….هذيك حرفتي لاتوصي يتيم على بكى

مازال خاصني بنت أخرى……موجودين اللي بغيتي حتى عشرة

بنيتة غزالة ماتفوتش العشرين ……….تساعفني بلا تكبر بلا تفرعين

مكالمة وحدة واحسبها بين يديك………فين ما كانت نعزم ونحضرها ليك

ألو حبوبة فين شاداها………عندي مفاجأة عمرك ماتنساها

ذوك البلايص مايصلاحو ليك …….نطلبو سيدي ربي يعفو عليك           

وقيلة التمثيل فتح ليك بابو …..والمخرج ردك وحدة من صحابو

عندي دور راكب عليك…..بداية الشهرة أنا ضامنها ليك

بيزو شيري نشوفك عشية……نتسناك فالشمبر نقصرو شوية

*******  *******  *******

2

شمعة ضاوية دخلت للفن……تفرشو ليها زرابي وسخ وصبن

الرجالة مانحملهم يا لطيف……الكاستينغ مفتوح للجنس اللطيف

الخايبة والمعكسة بلا ما تعذب …….تبذل الحرفة بلا ماتكعى ماتتعصب

فرزهم بدا يتشهى ويقلب…….اختار الزين واللباس المقزب

قانون اللعبة حكم واختار…….المخرج وصاه على الزين البلار

لقاها فالبار وجابتها جربات ……..أول خطوة ضربات لصقات

من فيلم لفيلم تدور وتتبختر…..بلاطو يلوحها للثاني سهرانة وتقصر

نوصيك يا اللي ضحكات ليك الشاشة……توكظي ماتدوم ليك ساعة الفرفشة

البغي والفن بعاد مايتلقاو……بالحق فالكاستينغ تعادلو وتسواو

الشهرة المزروبة ديما منسية…….والبطلة البايرة راها محضية

ياحصرة على الشرف والنجومية……راحو فغمضة وأحلام وردية

تهديتي وزينك ذبال ……. تطمعي فكومبارس ومحال

شبعو… وبين القهاوي لاحوك……تسناي الدفعة الجاية يمشوك

بسبابك تنساو ممثلات …….شريفات عفيفات نقيات

الممثلة الواعية مطالعة وفايقة…….  دارسة الميدان باحثة وعايقة

رفعات راسها بالشان والهمة……… مارست حرفتها معززة مكرمة

ما تضسر منوالى ما تطلب………. تقصد راس العين وتشرب

لا زينك بقى لا وجهك تنقى……… هذي نهاية اللي ما يتعب ما يشقى

ريك العوج لاحك للزنقة………. وحكايتك تدور من حلقة لحلقة

 *******  *******  *******

3

بطالية تطبع الأيام……… وهمها منتوج بالعرام  

لا قراية لا مستوى يفرح ……. لا بيع لا شرى يربح

كشفات نصها وساقها عريان…….تزينات وظنت مستقبلها بان

مقنتة تطفي وتشعل……. شافها جرو المخرج وجهل

قصدها وتبسمات بالحيلة……. الزوينة تصلاحي ممثلة

فعالم الفن لا كلمة فوق كلمتي………. اختارتك تكوني بطلة إلى قبلتي

أه؟ بلا ما تطمعني أذاك البرهوش……والله ما كذبت عليك أزين المنقوش

العار واش داوي معقول أ الظرييف؟…….. الخدمة ما تبغي تفلية أ الطرييف

اللي ما عرفك خسرك أ الوجه المبشور…….. ومانعاودش ليك يلى كانت إسطوار دامور 

مؤهلاتك غاتخلي شانك عالي…….. مرحبا بيك فعالم الفن الخالي

برعيني ما ننساك حتى تبان….. يدي فيدك من هاذ البار حتى لكان

أنا عجينتك واصنع كل ما تعشق……. غير  مع النجومية أنا ما نتعاتق

حلفت بحلوفي حتى نقذك من التسلكيط…..  من الطروطوار للممارسة فالشريط

.أوووه.. شحال  حسبتي خيرك غلبني ؟……..حشومة تقوليها غير لحمك يكفيني

حيوان هجم على الثقافة……. فتح الباب للعاهرة والشوافة

الدهشة حضرات والتصوير جاري……. الجو غريب على بنت الكباري 

الكاميرا شعلات والرجفة بدات….. عنقات المنتج واللقطة تأجلات

تعاود المشهد مرات ومرات…… والمساعد بالغوات بلحوحتو خرجات

فن الموضة والشهوى….. يموت الممثل وتحيا النزوى

الكبت سيد الإبداع……. رجاي نقذونا من الضياع

هذا زمان تجار الهوى….. والكونطرا تتسينا فالبار والقهوة

عيب على المخرج  الهاجم…… ما قاري ما سامع وداخل مفاقم 

ما يفرق البلان من السيكونس…….التقني يتومر وهو يعنق ويبوس

تلاقى مول الجبهة مع المنحوس……. خربقو واعطاونا فيلم مندوس

الراقصة رفعتوا ليها الكراد….. والسينما صيفطتوها للمزاد                 

اتقاو وجه الله وجمعو قلوعكم…… اعطيونا التيقار بلا ما نفضحكم

البركة فالرواد يغيرو على الميدان……..الإتقان والحفاظ على كرامة الفنان

وسختي الميدان يا جبان…… دخلتي جنب وشردتي الفنان

الفنان مناضل ومكافح……. مهزلة صبح مستقبلو فيد مصاطح

عن baytte

شاهد أيضاً

إحسان حاضر

تتويج إحسان حاضر بلقب بطلة المغرب لتحدي القراءة العربي

تمثل المغرب في التصفيات العربية النهائية المزمع تنظيمها خلال شهر أكتوبر 2022 بيت الفن توج …

اترك تعليقاً

لن يتم نشر عنوان بريدك الإلكتروني.